Mancini: Þetta tap var mér að kenna

Roberto Mancini, stjóri Manchester City, kennir sjálfum sér um tapið á móti Everton í gær en það þýddi að nágrannarnir í Manchester United náðu City að stigum á toppi ensku úrvalsdeildarinnar.

„Þetta var tap var líklega mér að kenna af því að við undirbjuggum okkur ekki vel fyrir þennan leik. Ég hélt að þetta yrði auðveldari leikur en raun bar vitni en enginn leikur er auðveldur," sagði Roberto Mancini.

„Leikmennirnir gerðu allt sitt inn á vellinum en ég gerði mistök á síðustu þremur dögunum fyrir leikinn," sagði Mancini.

„Everton er öflugt lið á heimavelli og liðið spilar alltaf vel á móti okkur. Við fengum okkar möguleika en eftir markið þeirra þá sköpuðum við engin færi," sagði Mancini.

„Nú er mjög mikilvægt að við vinnum Fulham á laugardaginn. Tímabilið er langt og við eigum fimmtán leiki eftir. Vonandi ná allir leikmenn að jafna sig fyrir leikinn um helgina. Við verðum að safna orku í vikunni," sagði Mancini.