Réttarhöldin yfir Terry fara ekki fram fyrr en eftir EM í sumar

John Terry, fyrirliði Chelsea og enska landsliðsins, þarf ekki að mæta í réttarsal fyrr en í júlí eftir að afgreiðslu málsins um kynþáttahatur hans var frestað í dag. Lögmaður Terry mætti fyrir dómara og lýsti yfir sakleysi umbjóðanda síns.

Terry hefur verið kærður fyrir kynþáttafordóma gagnvart Anton Ferdinand, leikmanni Queens Park Rangers, í leik liðanna í október en leikmaðurinn hefur alla tíð neitað allri sök.

Hámarksrefsing fyrir kynþáttafordóma á opinberum vettvangi eru 2500 pund eða um 490 þúsund íslenskar krónur. Málinu var frestað í dag og verður ekki tekið upp fyrr en 9. júlí en þá verður fótboltatímabilinu lokið hjá John Terry. Hann er á leiðinni á EM með enska landsliðinu í sumar.

„Herra Terry fagnar að fá tækifæri til þess að hreinsa sitt nafn," sagði í yfirlýsingu frá lögfræðiliði Terry.

Þar er einnig ítrekað að Terry hefur alla tíð haldið því fram að hann hafi sagt umrædd orð þegar hann hélt að Ferdinand væri að saka sig um kynþáttahatur. Upptaka náðist af Terry þar sem hann sést greinilega öskra ljót orð í átt að Ferdinand.