Knattspyrnumaður rekinn fyrir vafasama Twitterfærslu

Lee Steele er nafn sem fáir könnuðust við en hann hefur vakið athygli á Englandi og víðar eftir að hann var rekinn frá knattspyrnuliðinu Oxford City sem leikur í ensku 2. deildinni sem áður var 4. deild.

Steele skrifaði vafasama færslu á Twitter þar sem hann var með fordóma í garð Gareth Thomas sem er einn þekktasti ruðningsleikmaður Bretlandseyja. Thomas kom út úr skápnum árið 2009 og hefur hann frá þeim tíma vakið athygli á málefnum samkynhneigðra.

Hann er keppandi í vinsælum veruleikaþætti, „Big Brother" og Twitterfærsla Steele var skrifuð á meðan einn slíkur þáttur var í loftinu.

Þetta fór ekki vel í forráðamenn Oxford og ráku þeir Steele sem skrifaði; „Ég hefði ekki kunnað að meta það að vera í næsta rúmi við hliðina á Gareth Thomas."