Auglýsingaherferð vegna offitu barna í Bandaríkjunum hneykslar

Nýleg auglýsingaherferð gegn offitu barna í Georgíufylki í Bandaríkjunum hefur vakið hörð viðbrögð. Auglýsingarnar sýna sorgmædd börn sem lýsa einelti og öðrum erfiðleikum. Sérfræðingar segja að þetta sé gert til að varpa ljósi á alvarleika málsins á meðan gagnrýnendur segja að auglýsingarnar brjóti niður sjálfstraust barnanna.

Auglýsingaherferðin var skipulögð af heilbrigðisyfirvöldum í Georgíu en offita barna er alvarlegt vandamál í fylkinu. Skipuleggjendur herferðarinnar vonast til að hafa áhrif á foreldra í Georgíu.

Niðurstöður rannsóknar sem framkvæmd var á síðast ári gefa til kynna að foreldrar í Georgíu geri sér ekki grein fyrir því þegar börn þeirra eru of þung. Þannig telja um 75% þeirra foreldra sem eiga of þung börn að ekkert sé í ólagi. Enn fremur telja 50% þátttakenda rannsóknarinnar að offita í Georgíu sé ekki vandamál.

Gagnrýnendur segja að auglýsingaherferðin sé einungis til þess gerð að brennimerkja börnin og hún geri lítið til að leysa vandamálið.

Hægt er að sjá auglýsingarnar hér.