Ferguson býst við því að Scholes haldi áfram

Sir Alex Ferguson, stjóri Man. Utd, segist vera fullviss um að miðjumaðurinn Paul Scholes mæti aftur til leiks með Man. Utd á næsta tímabili.

Orðrómur er um að hinn 38 ára gamli Scholes leggi skóna aftur á hilluna í sumar en Ferguson trúir því ekki.

"Ég væri hissa ef Paul hefði rætt þetta mál við einhverja en ekki við mig. Hann hefur ekki gert það," sagði Ferguson.

Einnig er rætt mikið um framtíð þeirra Ryan Giggs og Rio Ferdinand hjá félaginu.

"Ryan gæti spilað í eitt eða tvö ár í viðbót. Rio hefur verið frábær í vetur. Þessir orðrómar koma samt því við gefum eldri leikmönnunum aðeins eins árs samning."