Rodgers: Sterling má ekkert fara að slaka á

Brendan Rodgers, stjóri Liverpool, hefur varað ungstirnið Raheem Sterling við því að það verði ekkert hægt að hafa það huggulegt þó svo hann sé búinn að skrifa undir fimm ára samning við félagið.

Sterling skrifaði undir samninginn í dag en það hefur ekki verið auðvelt að ganga frá samningnum því bæði Man. Utd og Arsenal sýndu áhuga á leikmanninum.

"Ég óska leikmönnum alltaf til hamingju með nýja samninga og síðan vara ég þá við. Ég segi þeim að þeir verði að ákveða hvort þeir vilji annan samning við stórt félag er núverandi samningur rennur út eða hvort þeir vilji keppa með minni liðum," sagði Rodgers.

"Það er ekki bara hægt að treysta á þennan eina samning og ég mun sjá til þess að hann viti það. Menn fá samning fyrir það sem þeir gerðu í fortíðinni."