Benitez orðaður við Real Madrid

Rafa Benitez, stjóri Chelsea, er ekki til í ræða neitt hvað verður þegar samningur hans við Chelsea rennur út næsta sumar.

Eftir erfiða byrjun undir hans stjórn hefur Chelsea aðeins verið að rétta úr kútnum en það voru mikil vonbrigði að liðið skyldi ekki vinna HM félagsliða.

"Ég samdi við Chelsea því mér fannst það góður kostur. Framtíðin? Ég veit ýmislegt en ég ætla ekkert að ræða Real Madrid. Mér finnst það ekki vera rétt. Ég er að einbeita mér að mínu verkefni hjá Chelsea," sagði Benitez en hann er sannfærður um að honum takist að vinna stuðningsmenn félagsins á sitt band.

Einhverjir fjölmiðlar hafa verið að orða hann við Real Madrid en eins og lesa má að ofan vill hann ekki ræða það mál.