Joe Allen orðinn leikmaður Liverpool

Liverpool staðfesti það á heimasíðu sinni í kvöld að liðið sé búið að ganga frá kaupum á velska landsliðsmanninum Joe Allen frá Swansea. Allen er annar leikmaðurinn sem Brendan Rodgers fær til Liverpool síðan að hann settist í stjórastólinn á Anfield.

„Mér líður ótrúlega vel. Það þekkja allir sögu þessa klúbbs og þetta er risa félag. Ég er mjög ánægður að vera orðinn leikmaður Liverpool. Ég hef ástríðu fyrir fótbolta eins og fólkið hér og hlakka til frábærra ára sem eru framundan hjá Liverpool," sagði Joe Allen í viðtali á heimasíðu Liverpool.

„Ég er afar sáttur með að Joe sé tilbúinn að koma með okkur í þetta ferðalag. Joe passar fullkomlega inn í hugmyndir mínar með liðið og hann hefur mikla hæfileika til að stýra miðjuspilinu og halda boltanum innan liðsins. Hann fékk frábæran skóla hjá Swansea og er nú tilbúinn að taka næsta skref á sínum ferli," sagði Brendan Rodgers, stjóri Liverpool.