Arsenal-maðurinn skoraði þegar Suður-Kóreumenn náðu bronsinu

Park Chu-Young, leikmaður Arsenal, skoraði fyrra mark Suður-Kóreu í 2-0 sigri á Japan í leiknum um bronsið í fótboltakeppni Ólympíuleikanna í London en leikurinn fór fram á Þúsaldarleikvanginum í Cardiff.

Þetta er í fyrsta sinn sem Suður-Kórea vinnur til verðlauna á Ólympíuleikum en besti árangur Kóreumanna fyrir leikana í London var sæti í átta liða úrslitum á ÓL í London 1948 og í Aþenu 2004.

Park Chu-Young skoraði markið sitt á 38. mínútu leiksins en Koo Ja-Cheol bætti síðan við öðru marki á 57. mínútu.

Suður-Kórea tapaði 0-3 fyrir Brasilíu í undanúrslitunum en Mexíkó sló út Japana. Úrslitaleikur Brasilíumanna og Mexíkóbúa fer fram á Wembley á morgun.