Íkorni var næstum því búinn að drepa stjóra Scunthorpe

Það verður seint sagt að lífið leiki við Alan Knill, stjóra Scunthorpe. Liðið hans er búið að tapa sex leikjum í röð og svo var íkorni næstum því búinn að drepa hann.

Knill var úti að hjóla í rólegheitum þegar hann varð fyrir "íkornaárás".

"Ég sá íkornann koma út á götuna en gat ekkert gert. Hann hljóp beint inn í rimlana og festist þar. Ég kastaðist fram fyrir mig og lenti á hausnum," sagði Knill um þessa dramatísku reynslu.

"Ég hélt ég væri í vondum málum í loftinu og þegar ég lenti var það fyrsta sem ég hugsaði að ég væri á lífi. Ég er allur marinn en ég hefði hæglega getað dáið. Þetta var fáranlegt."