Williams langaði að rota Suarez

Ashley Williams, fyrirliði Swansea, er heldur betur búinn að tendra bálið fyrir leikinn gegn Liverpool um helgina. Það er nefnilega verið að birta útdrátt úr bók hans í vikunni en þar tekur hann Luis Suarez, leikmann Liverpool, í gegn.

"Það er einhver ára í kringum Suarez eins og hann sé ósnertanlegur. Öll hegðun hans gerði það að verkum að mig langaði að rota hann," skrifaði Williams eftir leik liðanna á síðustu leiktíð en bókin er í raun dagbókarfærslur leikmannsins úr ensku úrvalsdeildinni.

"Okkur varð öllum óglatt yfir því hvernig hann hagaði sér og hvernig hann nálgast leikinn. Það er enginn leikmaður í deildinni sem er jafn óþolandi og hann.

"Hann dýfir sér oftar en nokkur annar sem ég hef spilað við. Hann var svo duglegur í því að ég varð orðlaus. Allan leikinn var hann að láta sig detta og öskra.

"Menn eru vissulega farnir að dýfa sér meira í deildinni en flestir bíða þó eftir snertingu. Ekki Suarez."

Verður áhugavert að fylgjast með rimmu þeirra á sunnudag.