Tevez ætlar að ná bikarúrslitaleiknum

Carlos Tevez, fyrirliði Manchester City, stefnir að því að ná bikarúrslitaleiknum gegn Stoke sem fer fram þann 14. maí næstkomandi.

Tevez meiddist á vöðva aftan á læri þegar að City tapaði fyrir Liverpool fyrr í þessum mánuði og greindi Roberto Mancini, stjóri City, frá því í síðustu viku að hann yrði frá í fjórar vikur.

Samkvæmt því er hæpið að hann nái að spila í bikarúrslitunum en Tevez hefur engu að síður sett stefnuna á að ná þeim leik.

„Ég hef nú spilað í bikarnum með þremur mismunandi liðum og veit hversu mikilvæg sú keppni er,“ sagði Tevez. „Í sumum öðrum löndum er bikarinn ekki svo mikilvægur.“

„Það er alltaf sérstakt andrúmsloft sem ríkir í keppninni og ég er viss um að þessi leikur verði frábær.“

City hefur ekki unnið titil í meira en 30 ár og vonast Tevez að þessi bið sé nú senn á enda.

„Við höfum verið að spila vel og eigum nú möguleika að vinna eitthvað stórt fyrir félagið. Allir leikmenn vilja fá tækifæri til að spila svo mikilvæga leiki.“