Brott­vísun af ÓL stendur: Á­frýjun Úkraínu­mannsins vísað frá

Úkraínumaðurinn hefur vakið mikla athygli fyrir tilraun sína til að keppa með hjálm þar sem myndir voru af úkraínsku íþróttafólki sem fallið hefur í stríðinu gegn Rússlandi. Alþjóðaólympíunefndin (IOC) taldi það brot á reglum og var honum vísað úr keppni áður en hún hófst á fimmtudag.

Vladyslav taldi á sér brotið og ákvað að áfrýja ákvörðun Alþjóðaólympíunefndarinnar til Alþjóðaíþróttadómstólsins en dómstóllinn vísaði áfrýjun hans frá nú rétt áðan. 

Fulltrúar Alþjóðaíþróttadómstólsins segjast hafa fulla samúð með Vladyslav í þessu máli en að tjáningarfrelsi sínu geti hann ekki beitt í keppni. 

Vladyslav væri frjálst að sýna hjálm sinn í svokölluðum mixed zones, svæði þar sem íþróttafólk fer í viðtöl hjá hinum ýmsu fjölmiðlum, blaðamannafundum og á samfélagsmiðlum. En að sjálfur keppnisvöllurinn  sé heilagur.