Tevez vill semja við Boca Juniors

Sólstrandargæjinn Carlos Tevez segist vera búinn að fá nóg af endalausum ferðalögum á milli Argentínu og Evrópu og þess vegna vilji hann semja við uppeldisfélag sitt, Boca Juniors.

"Mér er alveg sama þó ég þurfi að taka á mig launalækkun. Ég er orðinn þreyttur á þessum ferðalögum og það kemur ekki til greina að fara aftur til Englands," sagði Tevez sem nýtur ljúfa lífsins í heimalandinu en þangað strauk hann eins og óþekkur krakki.

Boca hefur aftur á móti ekki efni á því að kaupa Tevez og það er ekki hann sem ræður ferðinni í einu og öllu. Einu raunhæfu möguleikarnir fyrir hann virðast vera að fara annað hvort til AC Milan eða PSG.

Hann verður því líklega að leggja á sig það erfiði að ferðast meira næstu árin.