Bolton áfrýjaði rauða spjaldinu

Owen Coyle, stjóri Bolton, var afar ósáttur við rauða spjaldið sem Gary Cahill, varnarmaður liðsins, fékk í leiknum gegn Tottenham í ensku úrvalsdeildinni um helgina. Félagið hefur áfrýjað spjaldinu.

Cahill var rekinn af velli af dómaranum Stuart Attwell strax á sautjándu mínútu fyrir að brjóta á Scott Parker.

„Það væri ansi vægt til orða tekið að segja að ég væri reiður vegna spjaldsins,“ sagði Coyle eftir leikinn. „Scott Parker er frábær leikmaður en hann snerti boltanum með vinstri fæti úti á kantinum og átti eftir 50 metra í markið.“

„Zat Knight var svo á miðsvæðinu og fleiri varnarmenn voru á leiðinni til baka. Þetta var því ekki augljóst marktækifæri sem tekið var af Parker.“

Knight sagði svo við enska fjölmiðla í dag að ákvörðun Attwell hafi verið glórulaus. „Ég bara trúði þessu ekki. Ég hélt að hann ætlaði að veita honum áminningu,“ sagði hann.

„Ég ræddi aðeins við dómarann í hálfleik. Ég held að hann muni sjá mjög eftir þessu þegar hann sér sjónvarpsupptökur af þessu.“