Gaddafi grafinn á leynilegum stað í dag

Ákveðið hefur verið að grafa Muammar Gaddafi fyrrum leiðtoga Líbíu á leynilegum stað í dag. Þetta kemur fram í máli talsmanns bráðabirgðastjórnar Líbíu í samtali við norska blaðið Verdens Gang.

Talsmaðurinn segir að gröfin verði leynileg til að forðast grafrán og einnig til að koma í veg fyrir að hún verði einhverskonar táknmynd í framtíðinni.

Enn eru misvísandi fréttir í gangi um hverning Gaddafi endaði líf sitt. Nú segir starfandi forsætisráðherra landsins að leiðtoginn hafi náðst lifandi en síðan farist þegar skotbardagi blossaði upp milli uppreisnarmanna sem höfðu hann í haldi og hermanna sem voru hliðhollir Gaddafi. Í þeim bardaga hafi Gaddafi fengið skot í höfuðið og látist samstundis.