Mancini: Getum ekki alltaf skorað 4-5 mörk í leik

Roberto Mancini, knattspyrnustjóri Manchester City, var vitanlega ánægður með sigur sinna manna á Wolves í dag en liðið trónir sem fyrr á toppi ensku úrvalsdeildarinnar með fimm stiga forystu á granna sína í Manchester United.

Leiknum lauk með 3-1 sigri City en úlfarnir náðu þó að minnka muninn í 2-1 þegar um stundarfjórðungur var til leiksloka. Heimamenn tryggðu sér þó endanlega sigurinn með marki í blálokin.

Mancini sagði eftir leikinn að leikmenn þurfi líka að kunna að vera þolinmóðir. „Það er mikilvægt því við getum ekki skorað 4-5 mörk í hverjum einasta leik. Ég veit ekki hvað við fengum mörg færi í fyrri hálfleik en markvörðurinn þeirra varði mjög vel.“

„Við spiluðum vel í seinni hálfleik en það er stundum erfitt að skora. Það var mjög mikilvægt að vinna Wolves í dag.“

City vann 6-1 sigur á United um síðustu helgi en Mancini hvetur þó stuðningsmenn liðsins til stillingar. „Ég vil ekki að þeir haldi að hver einasti leikur verði auðveldur. Leikmenn þurfa alltaf að leggja sig hundrað prósent fram því leikir geta breyst á augabragði. Það sýndi rauða spjaldið í dag,“ sagði hann og átti þar við er Vincent Kompany fékk rautt og um leið dæmda á sig vítaspyrnu í seinni hálfleik. Wolves skoraði úr vítinu og hleypti þar með spennu í leikinn.

City mætir Villarreal á þriðjudaginn og ákvað Mancini því að byrja með Mario Balotelli á bekknum í dag. „Sergio þarf að spila eftir að hafa jafnað sig á meiðslum og Edin Dzeko var góður í síðasta leik. Það er líka mikilvægt að hvíla Mario af og til.“