Anelka: Vð getum alveg náð United

Nicolas Anelka, franski framherjinn hjá Chelsea, trúir því að Chelsea geti náð Manchester United og unnið enska meistaratitilinn annað árið í röð. Chelsea er níu stigum á eftir United fyrir leiki helgarinnar og auk þess búið að spila leik meira.

Anelka veit kannski hvað hann syngur því hann tók þátt í mikilli endurkomu hjá Arsenal tímabilið 1997-98. Arsenal var þá 13 stigum á eftir Manchester United en vann tíu leiki í röð og tókst að lokum að tryggja sér titilinn.

„Það verður erfitt að ná þeim en allt er mögulegt. Við verðum að vinna alla okkar leiki sem við eigum eftir. Kannski náum við því en það er allt annað en auðvelt að vinna alla leiki. Mikilvægast er þó að vinna leikina á móti liðunum í kringum okkur," sagði Nicolas Anelka en Chelsea á eftir að mæta United tvisvar sinnum í deildinni.

„Þegar ég var með Arsenal 1998 þá höfðum við trúna enda er allt hægt í fótbolta. Leikmennirnir í Chelsea skortir ekki sjálfstraust enda vitum við allir hvað við getum. Við þurfum samt að spila saman inn á vellinum og allir ellefu leikmennirnir þurfa að vinna saman. Það hefur verið vandamálið að undanförnu," sagði Anelka.

Nicolas Anelka hefur ekki skorað í ensku úrvalsdeildinni síðan 30. október en hann hefur leikið níu deildarleiki í röð án þess að skora. Anelka hefur alls skorað 11 mörk í 26 leikjum í öllum keppnum á þessarri leiktíð og hann skoraði í bikarsigrinum á móti Ipswich um síðustu helgi.