The Sun: Eiður gefur eftir 1,9 milljón í viku hverri

Samkvæmt frétt enska götublaðsins The Sun í dag mun Eiður Smári Guðjohnsen hafa tekið á sig launalækkun til að komast til Fulham.

Eiður Smári var lánaður á mánudaginn til Fulham frá Stoke til loka leiktíðarinnar. Þá rennur samningur hans við Stoke út.

Samkvæmt frétt The Sun fær Eiður Smári 40 þúsund pund í vikulaun hjá Stoke, um 7,5 milljónir króna.

Fulham greiðir Stoke 10 þúsund pund, tæpar 1,9 milljónir króna, á viku samkvæmt lánssamningnum og Eiður Smári er sagður gefa eftir sömu upphæð af laununum sínum í viku hverri.

Samkvæmt þessu hafa launagreiðslur Stoke til Eiðs Smára minnkað um helming - úr 40 þúsund pundum í 20 þúsund pund. Eiður stendur eftir með 30 þúsund pund í vikulaun - um 5,6 milljónir.

Í sömu frétt er fullyrt að Stoke hafi verið tregt til að leyfa Eiði að fara til annars félags í ensku úrvalsdeildinni og að forráðamenn Stoke hefðu unnið að því að koma honum til Feyenoord í Hollandi.

Það skal þó tekið fram að fréttir af launamálum Eiðs Smára í enskum fjölmiðlum hafa reynst afar misjafnar.

Í haust fullyrtu fjölmargir fjölmiðlar að Eiður Smári væri með 75 þúsund pund í vikulaun hjá Stoke City en að hans gamla félag, AS Monaco, greiddi hluta af þeirri upphæð.