Sagna fótbrotinn og verður frá í þrjá mánuði

Arsenal hefur staðfest á heimasíðu sinni að bakvörðurinn Bacary Sagna sé með brákað bein í fæti og verður frá næstu þrjá mánuðina vegna þessa.

Sagna fékk sprungu í hægra kálfabeinið eftir að hann var tæklaður af Benoit Assou-Ekotto í leik Arsenal og Tottenham í gær. Síðarnefnda liðið vann leikinn, 2-1.

Á heimasíðunni er tekið fram að ekki sé hægt að útiloka aðgerð á þessu stigi en franska dagblaðið L'Equipe fullyrti reyndar í gærkvöldi að Sagna myndi gangast undir aðgerð í dag.

Þetta er vitanlega mikið áfall fyrir Arsenal sem hefur misst marga leikmenn í meiðsli auk þess sem að liðinu hefur ekki gengið vel í upphafi leiktíðar. Að öllu óbreyttu mun Carl Jenkinson leysa stöðu hægri bakvarðar hjá félaginu þar til að Sagna getur spilað á nýjan leik - sem verður væntanlega í upphafi næsta árs.

Sagna var sárþjáður eftir tæklinguna í gær og vissi greinilega um leið að um alvarleg meiðsli væri að ræða.