Viðvörun til stuðningsmanna andstöðunnar

Stjórnvöld í Sýrlandi vöruðu í dag við því að þau muni snúast harkalega gegn hverju því landi sem styður formlega tilvist nýstofnaðs Þjóðarráðs Sýrlands.

Þjóðarráðið nýstofnaða samanstendur af andstæðingum Bashar al-Assad. Vestræn ríki eins og Bandaríkin og Frakkland hafa fagnað myndun þess, en þau hafa ekki boðið því formlega viðurkenningu.

„Við munum grípa til harkalegra aðgerða gegn þeim sem styður þetta ólögmæta ráð," sagði Walid al-Moualem, utanríkisráðherra Sýrlands, í sjónvarpsviðtali í dag.

Andstæðingar Assad segja sveitir hans hafa drepið minnst sex manns í gær þegar þær skutu á tugþúsundir syrgjenda við jarðarför stjórnarandstæðingsins Meshaal Tammo. Tammo var drepinn á föstudaginn var á heimili sínu, en hann átti að spila stórt hlutverk í Þjóðarráðinu.