Ánægður með lélegt gengi enskra liða í Meistaradeildinni

John Terry fagnar því að ekkert enskt félag hafi komist í undanúrslit Meistaradeildar Evrópu. Hann segir að það muni nefnilega hjálpa enska landsliðinu á HM í sumar.

Þetta er í fyrsta skipti í sjö ár sem ekkert enskt félag kemst í undanúrslit.

„Það er svekkjandi að það sé ekkert enskt lið í úrslitaleiknum því það er stærsti leikur sem hægt er að spila fyrir félagslið. En enska landsliðið hittist í Austurríki 17. maí og úrslitaleikurinn er fimm dögum áður.

Hefðum við átt leikmann þar hefði vantað leikmenn í hópinn á mikilvægum tíma í undirbúningnum. Núna verðum við allir saman og það er jákvætt. Ég er líka viss um að Capello fagnar þessu," sagði Terry.