Breskir blaðamenn eru viðbjóðslegir

Sir Alex Ferguson, stjóri Man. Utd, er foxillur í breska blaðamenn sem hann segir vera viðbjóðslega. Hann segist hreinlega ekki skilja þá.

Fjölmiðlar gerðu mikið úr því að Ferguson hefði sagt það vera dæmigerða hegðun hjá Þjóðverjum að fiska Rafael af velli í leiknum gegn FC Bayern. Stjórinn hefði frekar viljað sjá þá hampa leik liðsins.

„Það er erfitt að skilja blaðamenn. Einn þeirra sagði mér að eftir úrslitaleikinn í Meistaradeildinni í Róm í fyrra hefðu bresku blaðamennirnir verið yfir sig ánægðir með að við skildum hafa tapað leiknum. Þeir voru í skýjunum með þetta - enskir blaðamenn," sagði Ferguson hneykslaður.

„Sá sem sagði mér þetta varð óglatt. Það er staðreynd og hann hafði enga ástæðu til þess að ljúga að mér. Frammistaða okkar gegn Bayern var frábær. Þegar við komumst 3-0 yfir hefðum við getað verið 5-0 yfir. Við vorum frábærir, algjörlega magnaðir. Það týnist því menn eru að leita að fyrirsögnum. Það er viðbjóðslegt því leikmenn áttu betra skilið."