Landon Donovan spilar sinn síðasta leik með Everton um helgina

Bandaríkjamaðurinn Landon Donovan leikur sinn síðasta leik fyrir Everton um helgina en þetta er nú orðið endanlega ljóst. Síðasti leikur Donovan verður á móti Birmingham City á St. Andrews í Birmingham á laugardaginn.

Everton var að vonast eftir því að framlengja þriggja mánaða lánsamning við bandaríska félagið LA Galaxy en samningurinn er að renna út.

Það tókst ekki og Donovan heldur því aftur til LA Galaxy eftir helgina þar sem að bandaríska félagið vildi fá hann strax aftur.

Landon Donovan er búinn að leika 9 leiki með Everton í ensku úrvalsdeildinni og hefur skorað í þeim 2 mörk og gefið 3 stoðsendingar. Everton hefur náð í 19 stig af 27 mögulegum í þessum leikjum.