Erlent

Mikil hræðsla greip um sig meðal íbúa Haítí

Mikil hræðsla greip um sig meðal íbúa Haítí í dag þegar sterkur eftirskjálfti reið yfir. Forsætisráðherra landsins telur að yfir 100 þúsund manns hafi látið lífið í jarðskjálftanum sem varð fyrr í vikunni.

Á Haíti búa 10 milljónir manna á landssvæði sem er um þriðjungur af stærð Íslands. Í og við höfuðborgina Port au Prince búa um tvær milljónir.

Jarðskjálftinn í vikunni var um 7 á Richter og ef spár um mannfall ganga eftir er hann einn af 10 mannskæðustu jarðskjálftum sögunnar.

Eyðileggingin í höfuðborginni er gríðarleg. Eitt af hverjum tíu húsum borgarinnar er rústir einar. Flest þeirra húsa sem eftir standa eru verulega skemmd. Íbúar þeirra þora ekki inn og kjósa frekar að sofa undir berum himni.

Um alla borg er fólk að leita ástvinum, sem sumir hverjir eru enn grafnir í rústum húsanna, tæpum fimm dögum eftir að skjálftinn skall á borginni. En af og til kviknar von. Ástralskir sjónvarpsmenn sem voru að störfum í gær heyrðu barnsgrát úr rústunum og náðu að bjarga 14 mánaða gömlu stúlkubarni. Stúlkan heitir Winnie. Foreldrar hennar fórust báðir í skjálftanum.

Þeir sem bjargast úr rústunum er oft mikið slasaðir en sjúkrahúsin eru ekki nálægt því að anna öllum þeim sem þangað leita. Í náttúruhamförum af þessu tagi er ávallt allskonar tölur nefndar um mannfallið. Það eina sem víst er í þeim efnum er að það er gríðarlegt. Tölur á bilinu eitt til tvö hundruð þúsund hafa verið nefndar.


Tengdar fréttir

Hafa ekki gefið upp vonina að finna fólk á lífi

Vonir eru bundnar við að fólk finnist enn á lífi í rústum húsa sem hrundu í jarðskjálftanum á Haítí í vikunni. Íslenska björgunarsveitin sem verið hefur að störfum í Port au Prince, höfuðborg landsins, síðustu tvo daga heldur áfram leit sinni í dag.

Íslendingarnir njóta verndar friðargæsluliða

Íslenska alþjóðabjörgunarsveitin mun í dag vinna í rústum St. James hótelsins í Port au Prince á Haiti. Mun sveitin vinna að þessu verkefni með spænskri björgunarsveit með leitarhunda og undir vernd indverskra friðargæsluliða en talið er að það muni taka allan daginn, að fram kemur í tilkynningu frá Slysavarnafélaginu Landsbjörg. Þar segir að líkurnar á því að finna einhvern á lífi séu því miður ekki miklar þar sem langt er síðan jarðskjálftinn reið yfir. Í hamförum sem þessum sé flestum bjargað á fyrstu 48 klukkutímunum.

Enn er vitað um fólk á lífi

Enn er vitað um fólk á lífi í rústum húsa á Haíti. Félagar í íslensku rústabjörgunarsveitinni unnu fram á nótt að íslenskum tíma með bandarískri sveit við leit á tveimur svæðum suður af flugvellinum í Port au Prince. Með þeim voru friðargæsluliðar frá Sameinuðu þjóðunum því mjög er óttast um öryggi hjálparstarfsmanna.

Sjö milljónir í neyðaraðstoð á Haítí

Össur Skarphéðinsson, utanríkisráðherra hefur ákveðið að veita um sjö milljónum íslenskra króna til neyðaraðstoðar Matvælastofnunar Sameinuðu þjóðanna á Haítí. Þörf er á umfangsmikilli neyðar- og mannúðaraðstoð til handa öllum þeim mannfjölda, sem nú býr við mikla neyð, matarskort, lyfjaskort og skort á húsaskjóli í kjölfar jarðskjálftans á Haítí fyrr í vikunni.

Sýna björgunarsveitinni vinsemd

Íslenska alþjóðabjörgunarsveitin er nú að rísa úr rekkju á Haítí en þar er klukkan að verða sjö að morgni. Íslendingarnir eru vel stemmdir og tilbúnir til að takast á við verkefni dagsins, að fram kemur í tilkynningu frá Slysavarnafélaginu Landsbjörg. Ekki er þó enn ljóst hver þau eru.

Íslendingarnir heilir á húfi

Fregnir hafa borist af því að nokkuð stór eftirskjálfti hafi orðið á Haítí og segja erlendir miðlar frá því að hann hafi sett strik reikninginn í vinnu björgunarliðs. Haft hefur verið samband við íslensku alþjóðasveitina og hefur fengist staðfest að allir úr íslenska hópnum eru heilir á húfi. Þetta kemur fram í tilkynningu frá Slysavarnafélaginu Landsbjörg.

Óttast um öryggi almennra borgara

Óttast er um öryggi almennra borgara í Port au Prince höfuðborg Haítí. Þegar rúmir fjórir dagar eru síðan að harður jarðskjálfti skók landið hafa ýmis vandamál líkt skemmdir á vegum orðið til að erfiðlega hefur gengið að koma hjálpargöngum til þurfandi íbúa.

Össur hitti aðstandendur björgunarmanna

Össur Skarphéðinsson, utanríkisráðherra, heimsótti í dag höfuðstöðvar Slysavarnafélagsins Landsbjargar í Skógarhlíð en þar hefur verið unnið allann sólarhringinn frá því jarðskjálftinn reið yfir Haítí. Þar hitti ráðherrann meðal annars aðstandendur björgunarmanna.

Mest lesið


Fleiri fréttir

Sjá meira


×

Mest lesið