Umfjöllun: Jafntefli í fjörugum Reykjavíkurslag

Fram og Valur skildu í kvöld jöfn, 2-2, í fjörugum leik í Laugardalnum. Valsmenn komust 2-0 yfir í fyrri hálfleik en Framarar svöruðu fyrir sig og áttu góðan möguleika á að tryggja sér öll þrjú stigin sem í boði voru.

Valsmenn byrjuðu miklu betur í leiknum og náðu yfirhöndinni strax á níundu mínútu leiksins er Guðmundur Steinn Hafsteinsson skallaði fyrirgjöf Jóns Vilhelms Ákasonar í markið. Jón Vilhelm var þá sjálfur nýbúinn að eiga skalla að marki en Hannes Þór Halldórsson varði vel frá honum.

Aðeins þremur mínútum síðar fengu Valsmenn tækifæri til að gera nánast út um leikinn er Jón Gunnar Eysteinsson braut á Stefáni Eggertssyni, bakverði Valsmanna, og víti var dæmt. Danni König tók vítið sem var alls ekki slæmt en Hannes Þór varði glæsilega frá honum.

Valsmenn héldu áfram að vera með undirtökin eftir og König náði að bæta fyrir klúðrið í vítaspyrnunni er hann skoraði fínt mark með skalla á 31. mínútu. Martin Pedersen átti sendingu inn á teig úr aukaspyrnu og König stýrði knettinum í markhornið.

Eftir þetta virtust Framarar einfaldlega vakna til lífsins og fyrst þá byrjuðu þeir að sækja að einhverju ráði.

Það skilaði marki í blálok hálfleiksins er Jón Guðni Fjóluson hafði betur í baráttu við Kjartan Sturluson markvörð eftir fyrirgjöf Sam Tillen og skallaði boltann í markið. Það voru semsagt öll mörkin í fyrri hálfleik skoruð með skalla.

En þrátt fyrir að þrjú mörk hafi verið skoruð í fyrri hálfleik var sá síðari miklu líflegri og á köflum afar dramatískur.

Það byrjaði á því að Kristján Hauksson varði skot Arnars Sveins Geirssonar á línu og stuttu síðar átti Hjálmar Þórarinsson skalla yfir markið úr úrvalsfæri hinum megin á vellinum.

Kjartan Sturluson var svo nálægt því að gefa Frömurum jöfnunarmark er honum mistókst að hreinsa boltann frá marki og nánast rétti Tómasi Leifssyni boltann. Honum tókst þó að bjarga sér fyrir horn að lokum.

Á 76. mínútu gerðist svo afar sérstakt atvik. Sam Tillen tók aukaspyrnu langt utan af velli sem fór yfir alla leikmenn í teignum og hafnaði í netinu.

Þegar Framarar voru að fagna markinu kallaði Kristinn Jakobsson skyndilega Jón Guðna til sín og gaf honum beint rautt spjald. Honum var gefið að sök að hafa sparkað í Danni König sem lá í grasinu í kjölfar marksins.

En þrátt fyrir að hafi verið manni færri síðasta stundarfjórðunginn voru Framarar líklegri til að skora sigurmarkið. Besta færið fékk Joe Tillen sem var kominn einn gegn Kjartani markverði eftir sendingu Kristins Inga Halldórssonar. Kjartan varði hins vegar vel frá honum.

Þar við sat og bæði lið gengu heldur svekkt af velli. Niðurstaðan var þó líklega sanngjörn.

Fram - Valur 2-2

0-1 Guðmundur Steinn Hafsteinsson (9.)

0-2 Danni König (31.)

1-2 Jón Guðni Fjóluson (45.)

2-2 Sam Tillen (76.)

Laugardalsvöllur. Áhorfendur: Óuppgefið.

Dómari: Kristinn Jakobsson (6)

Skot (á mark): 18-9 (10-6)

Varin skot: Hannes 3 - Kjartan 8

Hornspyrnur: 4-5

Aukaspyrnur fengnar: 17-17

Rangstöður: 1-0

Fram (4-3-3):

Hannes Þór Halldósson 7

Daði Guðmundsson 6

Kristján Hauksson 6

Jón Guðni Fjóluson 7

Sam Tillen 7

Halldór Hermann Jónsson 6

Jón Gunnar Eysteinsson 5

Almarr Ormarsson 5

(56. Joe Tillen 6)

Tómas Leifsson 4

(78. Jón Orri Ólafsson -)

Ívar Björnsson 4

Hjálmar Þórarinsson 5

(88. Kristinn Ingi Halldórsson -)



Valur (4-3-3):

Kjartan Sturluson 7

Stefán Eggertsson 7

Reynir Leósson 6

Martin Pedersen 8 - maður leiksins

Greg Ross 7

Haukur Páll Sigurðsson 6

Sigurbjörn Örn Hreiðarsson 6

(84. Rúnar Már Sigurjónsson -)

Jón Vilhelm Ákason 5

(84. Ian Jeffs -)

Arnar Sveinn Geirsson 5

Guðmundur Steinn Hafsteinsson 5

(72. Haþór Ægir Vilhjálmsson -)

Danni König 6

Smelltu hér til að opna Boltavaktina og lesa lýsingu leiksins: Fram - Valur.