Arsenal komið í annað sætið - Bolton lagði West Ham

Arsenal er ekkert á því að gefa eftir í toppbaráttu ensku úrvalsdeildarinnar en liðið vann sinn fjórða leik í röð í dag. Að þessu sinni gegn Burnley, 3-1.

Arsenal er því jafnt Chelsea að stigum en hefur leikið einum leik meira.

Fabregas skoraði fyrsta mark leiksins. Það var afar glæsilegt. Nasri vippaði boltanum inn fyrir vörnina þar sem Fabregas var mættur og kláraði sendingu vel.

David Nugent jafnaði í upphafi síðari hálfleiks en það mark kom algjörlega gegn gangi leiksins. Arsenal hreinlega óð í færum og þá sérstaklega Nicklas Bendtner. Hann hefði getað skorað þrennu en var fyrirmunað að skora í dag.

Walcott braut síðan ísinn með laglegu skoti og Arshavin gulltryggði sigurinn í uppbótartíma.

Bolton er að rétta úr kútnum þessa dagana og vann góðan útisigur á West Ham.

Úrslit:

Arsenal-Burnley  3-1

1-0 Cesc Fabregas (34.), 1-1 David Nugent (50.), 2-1 Theo Walcott (60.), Andrei Arshavin (90.+4)

West Ham-Bolton  1-2

0-1 Kevin Davies (10.), 0-2 Jack Wilshere (16.), 1-2 Alessandro Diamanti (88.)