Kleinuhringir til að þreyja versta dag ársins

Kleinuhringjaát og ræktun brómberja er meðal þess sem nokkrir þekktir Bretar gera til að koma sér í gegnum ömurlegasta dag ársins sem var í gær.

Það var doktor Cliff Arnall, sálfræðingur og fyrrum kennari við Háskólann í Cardiff í Wales, sem reiknaði það út á dögunum að miðað við veðurfar, myrkur, jólavísareikninga og fleira væri mánudagurinn í síðustu heilu vikunni í janúar ömurlegasti dagur ársins. Sá dagur var einmitt í gær svo nú er hægt að fara að brosa framan í lífið aftur.

Blaðamenn Telegraph tóku sig til og spurðu nokkra þekkta einstaklinga hvað þeir gerðu til að koma sér heilum gegnum þennan andstyggilega dag sem kallast upp á engilsaxnesku Blue Monday. Óhætt er að segja að þar hafi kennt ýmissa grasa og fólk halli sér að ólíklegustu hlutum þennan gráa mánudag.

Einn nefndi sérstaklega óholla kleinuhringi, annar heimsækir uppáhaldskirkjugarðinn sinn, fyrir þá sem eiga sér einn slíkan, og sá þriðji fer hreinlega í golf. Önnur meðul voru fuglaskoðun, kaup á hreinum óþarfa, súkkulaðibúðingur og síðast, en alls ekki síst, flaska af Sainsbury´s-kampavíni. En bara hálf.