Vísindamenn snéru kynvísum ávaxtaflugum

Vísindamenn við Háskólann í Toronto í Kanada fundu út með þrotlausum rannsóknum að með því að breyta erfðaefnum ávaxtaflugunnar urðu þær samkynhneigðar. Flugurnar hættu að framleiða ákveðið ferómón, eða lykt, sem varð til þess að þær urðu ómótstæðilegar í augum annarra ávaxtaflugna - og þá skipti engu hvaða kyn var um að ræða.

Það var prófessorinn Joel Levine sem leiddi þessa merku rannsókn. Hann og kollegar hans fundu út að með því að draga úr ákveðnu ferómóni sem flugurnar noti til samskipta þá skapaðist nokkurskonar samfaraflóð (e. sexual tsunami) á milli flugnanna. Engu skipti hvaða kyn var um að ræða - allir sváfu hjá öllum.

Þessi tímamótarannsókn var birt í læknatímaritinu Journal Nature og hefur vakið víða athygli enda um margt áhugaverð.

Levine var svo eðlilega spurður hvort slíkt hið sama mætti gera við mannskepnuna, það er að segja að skapa nokkurskonar samfaraflóð með því að fikta í ferómóninu.

Hann taldi það ólíklegt þar sem mökunarferli manna er talsvert flóknara en hjá ávaxtaflugum. Við notumst mun meira við sjónræn áhrif að sögn Levine og höfum flóknari leiðir til þess að tengjast fólki tilfinningaböndum.