Heiðar skoraði í sigri Watford

Heiðar Helgason skoraði fyrra mark Watford í 2-0 sigri liðsina á Preston í ensku B-deildinni í dag.

Heiðar skoraði markið á 9. mínútu leiksins og var svo tekinn af velli á 71. mínútu. Hann hefur verið að jafna sig eftir meiðsli en þetta var hans fyrsti leikur í byrjunarliði Watford síðan hann kom til liðsins á láni frá QPR í september síðastliðnum.

Kári Árnason lék allan leikinn í stöðu miðvarðar með Plymouth sem vann 2-1 sigur á Doncaster.

Þá gerðu Reading og Ipswich 1-1 jafntefli. Ívar Ingimarsson lék allan leikinn fyrir Reading, Gylfi Þór Sigurðsson var tekinn af velli á 76. mínútu en Brynjar Björn Gunnarsson var á bekknum í dag.

Newcastle er enn með tveggja stiga forystu á toppi deildarinnar eftir 3-1 sigur á Peterborough í dag.

Watford er í tólfta sætinu með 24 stig, Plymouth í því 21. með fimmtán stig en Reading er í 22. sætinu með fjórtán stig.

Þá voru einnig margir leikir í 1. umferð ensku bikarkeppninnar í dag. Ármann Smári Björnsson var á bekknum og kom ekki við sögu er lið hans, Hartlepool, tapaði fyrir utandeildarliðinu Kettering á heimavelli.