Neda Soltan kjörin maður ársins - harðvítug átök í Íran

Hin tuttugu og sex ára gamla Neda Soltan frá Íran hefur verið kjörin maður ársins af breska tímaritinu Times. Neda var skotin í brjóstkassann í júní þegar hún mótmælti ásamt þúsundum eftir að Mahmoud Ahmadinejad var endurkjörinn forseti Írans. Mótmælendur vildu meina að hann hefði svindlað í kosningunum.

Dramatískt myndskeið náðist þegar Neda var skotin. Það fór eins og eldur um sinu á netinu og brátt varð Neda að andliti byltingar í Íran sem virðist enn standa yfir.

Það var síðast í dag sem íranskar öryggisveitir og umbótasinnar lentu í átökum í miðborg Teheran. Átökin byrjuðu þegar 200-300 manns reyndu að koma saman á Enghelab-torginu í Teheran.

Mikil spenna hefur verið á milli öryggisveita í Íran og umbótasinnum eftir að klerkurinn Ayatollah Hoseyn Ali Montazeri lést í síðustu viku. Fyrst lenti öryggissveitum og umbótasinnum saman í jarðarförinni í heimaborg hans, Qom.

Undanfarna daga hafa umbótasinnar og öryggissveitir einnig lent saman í tveimur öðrum borgum. Átökin hafa verið harkaleg en öryggisveitir hafa meðal annars beitt táragasi til þess að tvístra mannfjöldanum.

Hér má lesa umfjöllun Times í London um Nedu.