Demókratar bjartsýnir

Demókratar eru bjartsýnir frumvarp sem felur í sér umdeildar breytingar á heilbrigðiskerfinu verði að lögum fyrir áramót. Fulltrúadeild Bandaríkjaþings samþykkti frumvarpið naumlega í nótt. Harry Reid, leiðtogi demókrata í öldungadeild þingsins vonast til þess að afgreiðslu frumvarpsins í deildinni verði lokið fyrir næstu mánaðarmót.

Frumvarp Barack Obama er talið fela í sér einar mestu breytingar sem gerðar hafa verið í áratugi á heilbrigðiskerfi Bandaríkjanna. Opinberar tölur segja um 46 milljónir Bandaríkjamanna vera án sjúkratryggingar í dag.

Frumvarpið felur í sér að allir landsmenn verði að hafa slíka tryggingu og að þeir geti fengið hana á verði sem þeir ráða við. Þannig verður tryggingin niðurgreidd hjá þeim sem hafa ekki efni á henni. Auk þess verður fyrirtækjum skylt að bjóða starfsmönnum sínum upp á sjúkratryggingu. Einnig verður reynt að koma í veg fyrir að tryggingarfélögin geti neitað fólki með langvinna sjúkdóma um sjúkratryggingu og fellt niður tryggingar við veikindi

Obama hefur lagt allt kapp á að frumvarpið nái í gegnum þingið.