Ribery, Torres og Henry allir orðaðir við Manchester City

Roberto Mancini, nýi stjórinn hjá Manchester City, var varla sestur í stjórastólinn þegar menn fóru að spá því að hann verði duglegur að kaupa nýja leikmenn til félagsins þegar félagsskiptaglugginn opnar í janúar.

Innkaupalistinn er þegar orðinn svakalegur í slúðurheimum en á honum eru víst Thierry Henry (10 milljónir punda), Fernando Torres (80 milljónir), Sergio Aguero (40 milljónir), Angel Di Maria (35 milljónir), Franck Ribery (65 milljónir), Javier Mascherano, Yaya Touré og Matthew Upson.

Massimo Moratti, forseti Inter, hefur hinsvegar stigið fram að fyrra bragði og sagt að Mario Balotelli muni ekki standa Manchester City til boða. Það er ekki ólíklegt að stjórar leikmannanna hér að ofan munu hver á fætur öðrum loka dyrunum á Mancini.