Benitez: Ekki blöðrumarkinu að kenna að við töpuðum

Rafael Benitez segir að það hafi ekki verið blöðrumarkinu svokallaða að kenna að Liverpool tapaði fyrir Sunderland í ensku úrvalsdeildinni í dag.

„Þetta var vissulega sérstakt en við spiluðum ekki vel og því hef ég engan áhuga á að ræða það atvik," sagði Benitez eftir leikinn í dag.

„Við spiluðum ekki vel og gerðum nokkur mistök. Við töpuðum boltanum of oft og nýttum ekki færin okkar. Það skipti mestu hvað mig varðar."

„Við verðum að standa okkur betur ef við ætlum að vinna leiki eins og þessa."

Hann neitaði þó að játa að titilvonir Liverpool væru að engu orðnar þrátt fyri að félagið væri nú búið að tapa fjórum af níu leikjum sínum til þessa.

„Ef þetta tímabil væri venjulegt og toppliðin myndu varla tapa leik væri það öðruvísi. En Chelsea er þegar búið að tapa tveimur leikjum og ég held að það verði mun algengara að toppliðin tapi leikjum."