Annar Nígeríumaður handtekinn í flugvél frá Delta

Annar karlmaður frá Nígeríu var handtekinn um borð í Delta flugvél í dag á sömu leið og landi hans, Umar Farouk Abdulmutallab, sem reyndi að sprengja flugvél í loft upp á jóladag, flaug með. Frá þessu greinir AP fréttastofan.

Þar segir ennfremur að maðurinn hefði læst sig inni á klósetti en hann var að koma frá Amsterdam. Flugvélin lenti að lokum á heilu og höldnu í Detroit í Bandaríkjunum.

Var maðurinn handtekinn en áður hafði hann lent í deilum við flugfreyjur sem tilkynntu yfirvöldum um hugsanlega hættu. Ekki er ljóst hvort maðurinn hafi ætlað að fremja hryðjuverk líkt og landi hans Umar.

Alls voru 256 farþegar um borð og sakaði engan.

Þetta tilvik kemur upp aðeins tveimur dögum eftir að Umar reyndi að sprengja sig í loft upp um borð í farþegaþotu frá Delta en innanborð voru 300 farþegar. Farþegarnir náðu að stöðva hann eftir að eldur braust út vegna púðurs og vökvablöndu sem hann notaði sem sprengjuefni.

Umar hefur verið færður af spítala þar sem gert var að brunasárum sem hann hlaut eftir árásina. Ekki er gefið upp hvert farið verður með hann.

Mikill viðbúnaður hefur verið á flugvöllum víða um Evrópu eftir hryðjuverkaárásina. Meðal annars hafa tugþúsundir farþega í Bretlandi þurft að fara í gegnum strangt eftirlit á leið sinni vestur um haf yfir hátíðarnar.