Danskur bankaræningi kærði húsleit

Tæplega þrítugur Dani sem rændi banka í Kaupmannahöfn á fimmtudaginn gerði mistök sem hann gerir væntanlega ekki oftar. Lögreglu grunaði hver verið hefði á ferð í bankanum og fóru lögregluþjónar á heimili mannsins þar sem framkvæmd var húsleit, sem staðfesti grun hennar.

Hinn grunaði var ekki heima og skildi lögreglan eftir tilkynningu um að yfirvöld hefðu gert leit á heimilinu. Þegar íbúinn kom heim brást hann ókvæða við og hringdi þegar í lögreglu til að kæra húsleitina. Hann var látinn bíða í símanum þar til lögregla kom á staðinn og færði hann í annað húsnæði - ríkisrekið.