Carragher: Nú verðum við að standa saman

Jamie Carragher segir að leikmenn Liverpool verði einfaldleg að standa saman þrátt fyrir lélegt gengi í haust og tap fyrir Arsenal um helgina.

Arsenal vann leikinn um helgina, 2-1, og er Liverpool í sjöunda sæti deildarinnar með 24 stig, þrettán stigum á eftir toppliði Chelsea.

„Við byrjuðum vel í leiknum og áttum að fá víti. En það ber að hrósa Arsenal, þetta er topplið," sagði Carragher á heimasíðiu Liverpool.

„En fyrir utan mörkin þeirra fannst mér þeir ekki gera mikið í leiknum. Þess vegna var það svo erfitt að þurfa að kyngja þessu tapi."

„En tölfræðin er fljót að breytast og við verðum að gera allt sem við getum til að breyta henni. Það verður vissulega erfitt en hluti af því að spila með Liverpool er að geta staðist slíkar raunir."

„Við þurfum á köflum að sýna mikla hörku þar til tímabilinu lýkur í maí en við verðum að standa saman og gera það sem þarf að gera. Svo er bara að biðja til guðs að það verði þess virði þegar uppi er staðið."

Liverpool mætir Wigan á heimavelli á miðvikudaginn og segir Charragher að Liverpool verði einfaldlega að vinna þann leik.