Landtökumenn mótmæltu við heimili Netanyahu

Ísraelskir landtökumenn og stuðningsmenn þeirra komu í kvöld saman fyrir utan heimili Benjamin Netanyahu, forsætisráðherra, og mótmæltu nýlegri ákvörðun ísraelsku ríkisstjórnarinnar sem bannaði allar framkvæmdir á landtökusvæðunum á Vesturbakkanum.

Bobby Brown, talsmaður mótmælenda og fyrrverandi ráðgjafi Netanyahu, segir í samtali við BBC að landtökumenn og stuðningsmenn þeirra séu ákaflega reiðir. Einkum og sér í lagi forsætisráðherranum og hægristjórn hans. Þeir hafi ekki greitt hægriflokkunum atkvæði sitt í síðustu þingkosningum til að fara fram með þessum hætti.

Bandaríkjastjórn hefur að undanförnu þrýst á Ísraelsstjórn vegna framkvæmdanna á landtökusvæðunum. Fyrir skömmu sagði Barack Obama, Bandaríkjaforseti, að sér hugnaðist framkvæmdirnar illa. Hann sagði þær hvorki auka öryggi Ísraels né auðvelda friðarviðræður á svæðinu.

Deilur um landtökubyggðirnar eru meðal þess, sem helst hefur komið í veg fyrir friðarsamninga.