Liverpool vann og fór upp fyrir Manchester City

Liverpool vann langþráðan sigur í ensku úrvalsdeildinni í kvöld þegar liðið vann 2-1 sigur á Wigan á heimavelli. Tap Manchester City fyrir Tottenham þýddi að Liverpool komst alla leið upp í sjötta sætið en lærisveinar Mark Hughes steinlágu á White Hart Lane í kvöld.

David Ngog kom Liverpool yfir strax á 16. mínútu eftir sendingu frá Fabio Aurelio og Fernando Torres kom inn á sem varamaður og skoraði seinna markið á 79. mínútu. Charles N´Zogbia náði að minnka muninn fyrir Wigan í uppbótartíma. Liverpool komst með sigrinum upp í 6. sætið en liðið er með jafnmörg stig og Birmingahm en með betri markatölu.

Króatinn Niko Kranjcar skoraði tvennu í 3-0 sigri Tottenham á Manchester City en Jermain Defoe skoraði þriðja mark liðsins og kom Spurs þá í 2-0. Tottenham er með 30 stig í 5. sæti eftir sigurinn, tveimur stigum á eftir Arsenal og Aston Villa sem eru í sætunum fyrir ofan.