Viðræður Mascherano og Liverpool ganga vel

Rafael Benitez, stjóri Liverpool, segir að viðræður félagsins við Argentínumanninn Javier Mascherano gangi vel en Mascherano hefur verið orðaður við Barcelona-liðið að undanförnu.

„Við erum ánægðir með hvernig þetta gengur og hann er líka ánægðari núna. Síðasti fundur okkar um málið var mjög jákvæður," sagði Benitez. „Við vorum að tala við hann áður en nú er mikilvægt að við förum að ganga frá framtíð hans hjá félaginu," sagði Benitez.

„Það sjá það allir að hann er kominn á fullt á ný og farinn að spila sinn besta fótbolta," sagði Benitez sem segir að 50 milljóna punda tilboð væri ekki nóg til að hann myndi selja Argentínumanninn sem á tvö ár eftir af núverandi samningi sínum.