Gunnar Heiðar: 90 prósent líkur á að ég semji við Reading í vikunni

Gunnar Heiðar Þorvaldsson sagði í samtali við Íþróttadeild Stöðvar 2 í kvöld að það séu 90 prósent líkur á að hann verði leikmaður Reading á næstu dögum. Gunnar Heiðar yrði þá fjórði Íslendingurinn í liðinu en fyrir eru Ívar Ingimarsson, Brynjar Björn Gunnarsson og Gylfi Þór Sigurðsson.

Gunnar Heiðar hefur fengið fá tækifæri hjá Esbjerg í dönsku úrvalsdeildinni í vetur en fór á reynslu til enska B-deildarliðsins Reading á dögunum. Gunnar Heiðar nýtti tækifærið sitt vel því hann skoraði tvö mörk á þremur mínútum í sérstökum æfingaleik sem var settur upp fyrir hann með varaliði Reading.

Þjálfari Reading vill fá hann strax en Danirnir hafa verið tregir til að leyfa honum að fara. „Það er skrítið en ég held að þeir séu að mýkjast núna," sagði Gunnar Heiðar í viðtali í kvöldfréttum Stöðvar 2.

„Reading hefur rosalega mikinn áhuga á því að fá mig og ég átti gott spjall við þjálfarann. Hann er með stórt hlutverk fyrir mig í liðinu. Þeir töluðu um það að ég gæti byrjað á lánsamningi. Við vorum nokkurn veginn búnir að semja um það við Esbjerg," sagði Gunnar Heiðar í spjalli við Hans Bjarnason.

„Ég gæti þá farið á láni frá Esbjerg í einhvern tíma með síðan möguleika á samningi eftir það. Eigum við ekki að segja að það séu 80 til 90 prósent líkur á að ég fari til Reading. Ég vona að það gerist eftir helgi," sagði Gunnar Heiðar þegar Hans spurði hann hreint út um hversu miklar líkur væru á að þetta gengi eftir.

Fyrsti leikur Reading á nýju ári er ekki af smærri gerðinni því liðið mætir Liverpool í ensku bikarkeppninni 2. janúar.