Newcastle vill ekki selja Carroll

Mick McCarthy, stjóri Wolves, hefur útilokað að félagið muni kaupa sóknarmanninn Andy Carroll frá Newcastle þegar félagaskiptaglugginn opnar í janúar næstkomandi.

McCarthy greindi frá því að hann hafi haft áhuga á að fá Carroll síðastliðið sumar.

„Newcastle vildi ekki selja hann þá og hef ég ekki spurst fyrir um hann síðan," sagði McCarthy við enska fjölmiðla. Carroll hefur skorað fjögur mörk fyrir Newcastle í ensku B-deildinni á tímabilinu.

Sóknarmenn Wolves, Kevin Doyle og Sylvan Ebanks-Blake, hafa verið lengi í gang en McCarthy hefur verið ánægður með frammistöðu þeirra í síðustu leikjum.

„Mér finnst Sylvan hafa verið í sérflokki í síðustu þremur leikjum," sagði McCarthy. „Þeir hafa verið frábærir saman í þessum leikjum og samstarf þeirra er að blómstra."