Drogba setur stefnuna á 39 ára gamalt markamet hjá Chelsea

Framherjinn Didier Drogba hjá Chelsea hefur hreinlega farið á kostum til þessa á yfirstandandi keppnistímabili á Englandi en ef marka má nýlegt viðtal við kappan er hann hvergi nærri saddur.

Hinn 31 árs gamli Drogba skrifaði nýverið undir nýjan samning við Lundúnafélagið til ársins 2012 og viðurkennir að hann setji stefnuna á að bæta 39 ára gamalt markamet hjá Chelsea.

„Mér finnst ég vera ungur þrátt fyrir að ég sé 31 árs gamall og ef ég verð heppinn með að sleppa við meiðsli þá er raunhæft að ég geti slegið markametið hjá Chelsea.

Þannig get ég hjálpað liðinu að vinna titla því ég stefni á að gera allt sem ég get til þess að bæta nokkrum titlum í safnið hjá Chelsea, þá sérstaklega Meistaradeildar og úrvalsdeildartitlum," segir Droga í viðtali á opinberri heimasíðu Chelsea. Drogba hefur skorað 102 mörk fyrir Chelsea en markamet félagsins á Bobby Tambling en hann skoraði 202 mörk á sínum tíma.