Fagnar kosningum í Írak

Barack Obama forseti Bandaríkjanna segist fagna héraðskosningunum sem fram fóru í Írak í dag og segir þær mikilvægt skref í því að Írakar marki sér bjarta framtíð.

„Ég fagna því að írakar hafi haldið þessar mikilvægu kosningar í dag," sagði Obama í yfirlýsingu í kvöld. Obama lofaði því í kosningabaráttu sinni að kalla herlið Bandaríkjanna heim frá Írak. Að sögn Hvíta hússins er hann nú að skoða leiðir til þess að framkvæma þá aðgerð.

Með vísan til þess að stjórnvöld í Írak sáu alfarið um kosningarnar og að þær færu rétt fram sagði Obama: „Þetta mikilvæga skref ætti að vera liður í því að írakar taki ábyrgð á sinni framtíð."