Átökin magnast á Sri Lanka

Tala fallinna hækkar stöðugt á Sri Lanka en þar hafa átök aukist síðan stjórnvöld ákáðu að binda enda á vopnahléið í landinu. Tveir lögreglumenn féllu þegar sprengja sprakk í vegarkandi á norðurhluta eyjarinnar í morgun og alls létust um áttatíu manns í átökum helgarinnar.

Átök á milli Tamíltígra og stjórnarhermanna hafa farið stigvaxandi allt frá því vopnahlé sem stóð í sex ár var fellt úr gildi í síðasta mánuði og vopnahléseftirlitsmenn frá Noregi og Íslandi voru kallaðir heim. Á sunnudag voru 35 skæruliðar felldir í átökum og á laugardaginn lágu 40 í valnum.

Mannfall í röðum hermanna hefur verið minna en talið er að sjö stjórnarhermenn hafi fallið um helgina. En þrátt fyrir mikið mannfall virðast Tamíltígrarnir eflast og sjálfsmorðsárásum fjölgar með hverri vikunni sem líður. Árásirnar hafa verið gerðar vítt og breytt um eyjuna og hafa nokkrar sprengjur sprungið í höfuðborginni Colombo.