Mengistu dæmdur til dauða

Hæstiréttur Eþíópíu hefur dæmt Mengistu Haile Mariam til dauða. Mengistu var leiðtogi marxista sem tóku völdin í landinu eftir að keisarinn Haile Selassie missti stjórn á ríkinu í kjölfar mikillar hungursneyðar. Valdatímabil hans einkenndist af miklum ofsóknum í garð þeirra sem hann skilgreindi sem andstæðinga sína.

Mengistu var fundinn sekur um þjóðarmorð í heimalandi sínu árið 2006 og dæmdur í lífstíðarfangelsi í kjölfar þess. 11 af æðstu embættismönnum í stjórn Mengistus fengu einnig lífstíðarfangelsi en 47 aðrir fyrrum embættismenn fengu fangelsisdóma allt að 25 árum.

Saksóknari áfrýjaði dómnum á þeirri forsendu að lífstíðarfangelsi væri ekki nægileg refsing fyrir Mengistu og því var hæstiréttur sammála í dag. Mengistu hefur verið undir verndarvæng Roberts Mugabe í Zimbabve síðustu ár og því er ólíklegt að hann verði látinn svara til saka á meðan Mugabe heldur um valdataumana þar.

Meðan Mengistu var forseti Eþíópíu, frá 1977 til 1991, voru pólitískir andstæðingar hans stráfelldir í herferð sem nefnd var "Rauða hættan". Þeir sem minnsti grunur lék á að væru á móti stjórninni áttu á hættu að finnast myrtir á götum borga og bæja.

Mengistu er einnig grunaður um að hafa látið ráða keisarann fyrrverandi Haile Selaisse af dögum en hann lést árið 1975 en hann hefur neitað því staðfastlega.