Birkir: Dómarar hafa ekkert rætt um Stefán

Birkir Sveinsson, starfsmaður KSÍ og meðlimur dómaranefndar, segir að ekkert sé hæft í ásökunum Guðjóns Þórðarsonar.

Guðjón sagði að dómarar hefðu fundað til að fjalla um lið ÍA og þá sérstaklega Stefán Þórðarson.

„Einu fundirnir hjá KSÍ þar sem nafn Stefáns hefur borið á góma er þegar verið er að velja í landsliðið," sagði Birkir og neitar því að fjallað hafi verið um Stefán á fundum dómaranefndarinnar eða á fundum dómara. „Að sjálfsögðu ekki," sagði hann.

Guðjón sakaði einnig dómara um að vera marga hverja ekki í standi og að þeir hafi margir fallið á þolprófum í vor. Í viðtalinu bað hann um að fá að sjá þrek- og þoltölur Ólafs Ragnarssonar sem dæmdi leikinn í gær.

„Það gerist á hverju ári að einhverjir dómarar falli á þrekprófi," sagði Birkir. „En þá fá þeir ekki leyfi til að dæma fyrr en þeir standast prófin. Ólafur er því með sínar tölur í lagi, annars hefði hann ekki fengið að dæma í gær."

Guðjón var ómyrkur í máli gagnvart knattspyrnuforystunni en Birkir vildi að öðru leyti ekki tjá sig um málið.