Guðjón: Þeirra er skömmin (myndband)

Guðjón Þórðarson, þjálfari ÍA, var ómyrkur í máli gagnvart Ólafi Ragnarssyni dómara og forystumönnum KSÍ í viðtali við Stöð 2 Sport í gær.

Í viðtali við Guðjón Guðmundsson íþróttafréttamann eftir að ÍA tapaði fyrir Keflavík í gær sagði hann meðal annars að Ólafur hafi beitt Stefáni Þórðarsyni, leikmanni ÍA, ofbeldi með því að gefa honum rauða spjaldið.

Smelltu á hlekkinn hér að ofan til að sjá viðtalið í heild sinni.

„Það var fundur hjá dómurum þar sem það var útmálað að Skagaliðið væri svo gróft að það þyrfti að taka sérstaklega á því. Þar var sérstaklega fjallað um að þeir ætluðu að sýna Stefáni Þórðarsyni hvernig ætti að „díla" við hlutina," sagði Guðjón.

„Það ofbeldi sem hann (Ólafur Ragnarsson dómari) beitti Stefán í þessum leik er KSÍ og þeirri forystu sem hér fjallar um knattspyrnumál ekki til sóma."

Hann gaf einnig í skyn að Ólafur væri alls ekki í nægilega góðu formi til að sinna dómgæslu í knattspyrnu leik. Guðjón sagði einnig að Ólafur væri ekki eini dómarinn sem ekki væri í standi.

„Það voru menn sem fóru í test og stóðust ekki þrektölurnar," sagði hann.

„Það er alveg klárt, ef þessi leikur er greindur og atvik skoðuð þar sem dæmt er gegn okkur af hreinum ásetningi þá vinnur þú aldrei leik."

„Þessir aðilar sem núna fá þetta í andlitið frá mér, þeir skulu fá að svara fyrir þetta. Þeir geta dæmt mig í einhver bönn en þeirra er skömmin."