Dýrt að hlusta á Al Gore

Al Gore er þekktur fyrir baráttu sína gegn loftlagsbreytingum þeim sem nú eiga sér stað í heiminum. En það kostar skildinginn að hlusta á skoðanir Gore. Ástralskir fjölmiðlar hafa töluvert fjallað um hádegisverðarfund sem Gore og John Howard forsætisráðherra landsins héldu í Sidney í gærdag. Alls keyptu 700 manns sér aðgang að fundinum og komust færri að en vildu.

Í ræðu sinni á fundinum líkti Gore Bandaríkjunum og Ástralíu við útlagana Bonnie og Clyde í umhverfismálum þar sem hvorugt ríkið hefur enn staðfest Kyoto-bókunina. Og hann sagði einnig að vaxandi mannfjöldi ásamt tækniframförum hefðu breytt mannkyninu í umhverfislegan fíl í postulínsbúð. Í lok máls síns skoraði hann á bandarísk stjórnvöld að staðfesta Kyoto-bókunin hið fyrsta því þau gætu ekki staðist alþjóðlegan þrýsting um að gera það til lengdar.