Microsoft tapaði fyrir Evrópudómstólnum

Evrópudómstóllinn staðfesti í dag ákvarðanir framkvæmdastjórnar Evrópusambandsins gegn bandaríska tölvurisanum Microsoft. Ákvörðun dómsins getur haft verulega áhrif á Microsoft og Windows hugbúnaðinn.

Svo mikill áhugi var á niðurstöðu Evrópudómstólsins að sjónvarpað var beint úr dómssal í Lúxemborg í morgun.

Fyrir þremur árum úrskurðaði framkvæmdastjórn Evrópusambandsins að Microsoft hefði beitt yfirburðastöðu sinni á markaði til að koma í veg fyrir að samkeppnisfyrirtæki kæmust að með sínar vörur. Þannig hefði Microsoft komið forritum fyrir í Windows kerfinu og með því í raun útilokað samkeppnisforrit.

Dæmi um slíkt er Windows Media Player, sem ber höfuð og herðar yfir aðra hljóð- og myndspilara. Evrópusambandið sektaði Microsoft um sem svarar 45 milljörðum íslenskra króna og krafðist þess að fyrirtækið gæfi viðskiptavinum kost á að kaupa Windows án Media Player.

Microsoft áfrýjaði til Evrópudómstólsins, sem í morgun staðfesti að nær öllu leiti upphaflega ákvörðun framkvæmdastjórnarinnar. Talsmenn Microsoft sögðu fyrir fréttir að þeir væru enn að lesa dóminn og að þeir hefðu engar ákvarðanir tekið um framhaldið.